MA: Museoak eta Alzheimerra. Zure memoria, nire oroimena

Museoa eta bere erakusketa iraunkorreko atal bat ezagutzeko bisita egokitua.

Alzheimerra eta bestelako dementziak hasierako etapan edo moderatuan dituzten pertsonei zuzenduta.

Bisita honen bitartez, parte-hartzaile guztiengan, ongizate kognitiboa eta emozionala sustatu nahi dugu.

Bisitaren helburua museoaz gozatzea da eta izandako esperientzia gogoangarria izatea bisitarien haurtzaroa, gaztaroa eta helduaroa kontuan izanik.

Elkarrekin, 50-60-70 hamarkadetan murgilduko gara eta zentzumenen bitartez, garai horietako bizimodua izango dugu hizpide: familia-giroa, elikagadura, irratia, telebista, festa-giroa, erlazio pertsonalak, e.a

Objektu ezberdinak hartu, ikutu eta, batzuk, dastatu egingo ditugu. Garaiko irrati-programak entzun, musikaren erritmoarekin batera dantza egin eta gure bizipenak partekatuko ditugu garai horien inguruan.

Ekintza guzti hauen bitartez eta zentzumenen estimuluaren bitartez, oroitzapen pertsonaletara eta izandako sentimenduetara iritsiko gara.

Jarduera asteazkenetik ostiralera burutu daiteke, eta gehienez 10 pertsonako taldeentzat eta zaintzaileentzat antolatuta dago.

Esperientzia kalitatezkoa eta abegikorra izan dadin, jardueran zehar, taldeen beharrak kontuan izango dira etenaldiak, denborak eta elkarrizketa-uneak errespetatuz.