Torreko Hodia: aldi-baterako erakusketara bisita

Torreko Hodia Paleolitoko arte higigarriaren aparteko adibidea da. Hegazti baten hezurrez egindako hodi naturala da, eta duela 12.000 urte inguru egindako animalia-irudien grabatuak gordetzen ditu. Aldi baterako erakusketa honen bidez, Ekainberrik pieza berezi honen historia, ezaugarriak eta ikerketa zientifiko nagusiak aurkezten ditu.

Begiris elkartearen aholkularitzarekin, erakusketa itsuentzat eta ikusmen-urritasuna duten pertsonentzat egokitu da. Bisita gidatua da haren balio nagusia, eta, horrez gain, ukimen bidez esploratzeko hainbat elementu eskaintzen ditu: Torreko Hodiaren tamaina handiko erreplika bat, grabatuak atzematea errazten duen panel bat eta hodiaren benetako tamainako erreprodukzio bat. Halaber, audioak dituzten QR kodeak eta azalpen-bideo labur bat ere baditu.

Ekainberrira oinez baino ezin da iritsi. Aparkalekua Zestoan dago, eta handik Ekainberrirainoko ibilbideak 20 eta 30 minutu artean irauten du, taldearen erritmoaren arabera.